تامر حسني يشارك آخر مستجدات صحة نجله وينبه: ليست كل سخونية مجرد برد

أعلن الفنان تامر حسني عن تفاصيل الحالة الصحية لنجله «آدم»، الذي تم نقله إلى غرفة العناية المركزة في أحد المستشفيات بعد خضوعه لعمليتين جراحيتين، وقد أثار هذا الأمر قلق محبي النجمين ودفع الكثيرين لتوجيه رسائل دعم ودعاء بالشفاء للطفل.

كتب تامر عبر حسابه على «فيس بوك»: «أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني، اللي جاتلي منكم هنا، وعلى تليفوني وتليفونات كل المحيطين بيا، هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس، وبقولكم كده عشان تبقوا حريصين مع نفسكم أكتر ولولادكم، ومش كل سخونية تقولوا ده شوية برد، وخلاص لا روحوا اكشفوا كويس واعملوا سونار على البطن، والزايدة مرة و2 عشان برضو ساعات مش بيبان ولازم الدكتور يضغط بطريقة معيّنة، تقريبًا أقوى شوية عشان يعرف، لأني سمعت كتير اليومين دول إن الزايدة خادعة».

تابع: «اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي، وحبيبي آدم عمل عمليتين صعبين أوي عليه، وبدعواتكم مستنيين النتايج تكون خير يارب، ويعدي مرحلة الخطر يارب، بحق كن فيكون اشفيه وعافيه، هو وكل ولادنا بس هو راجل، وهيتحمل وإن شاء الله ربنا يكرمه ويعافيه ويحفظه هو وإخواته ويحفظ كل ولادكم يارب».

وأشار: «وأحب أقول تاني شكرًا من كل قلبي على دعواتكم. أنا شايف قلب كل حد فيكم وهو بيدعي بصدق، متشكر أوي يا جماعة شكرًا لكل اللي اهتم وسأل عن ابني ودعاله هنا أو على التليفون واللي طلعوله صدقات لشفائه من غير ما يعرفونا شخصياً، أنا مش لاقي كلام أشكركم بيه وأنا برضو بدعيلكم وبقول لكم مثلها وأضعاف أضعافها، وربنا يحفظكم ويحفظ أولادكم قادر يا كريم».

اقرأ أيضًا: